ਅਮਰੀਕੀ ਹਮਲਿਆਂ ਦੇ ਬਾਵਜੂਦ ਜਹਾਦੀਆਂ ਦੇ ਹੌਸਲੇ ਬੁਲੰਦ

ਮੁਰਸਿਤਪਿਨਾਰ (ਤੁਰਕੀ/ਬੈਰੂਤ): ਅਮਰੀਕਾ ਵੱਲੋਂ ਆਈæਐਸ਼ਏæ ਦੇ ਟਿਕਾਣਿਆਂ ਉਪਰ ਕੀਤੇ ਜਾ ਰਹੇ ਹਵਾਈ ਹਮਲਿਆਂ ਦਾ ਇਸ ਦੀ ਪੇਸ਼ਕਦਮੀ ‘ਤੇ ਬਹੁਤਾ ਅਸਰ ਨਹੀਂ ਪਿਆ। ਸੀਰੀਆ ਵਿਚ ਚੱਲ ਰਹੀ ਹਿੰਸਾ ਕਾਰਨ 1æ80 ਲੱਖ ਕੁਰਦ ਸ਼ਰਨਾਰਥੀ ਤੁਰਕੀ ਵਿਚ ਆ ਗਏ ਹਨ। ਤੁਰਕੀ ਨੇ ਅਜੇ ਤਾਈਂ ਜਹਾਦੀਆਂ ਖ਼ਿਲਾਫ਼ ਲੜਾਈ ਵਿਚ ਸ਼ਾਮਲ ਹੋਣ ਲਈ ਹਾਮੀ ਨਹੀਂ ਭਰੀ। ਬਰਤਾਨੀਆ ਆਧਾਰਤ ਇਕ ਮਨੁੱਖੀ ਅਧਿਕਾਰ ਸੰਗਠਨ ਨੇ ਆਖਿਆ ਕਿ ਜਹਾਦੀ ਮਿਸਤਾਨੌਰ ਪਹਾੜੀ ਦੇ ਦੱਖਣੀ ਹਿੱਸੇ ‘ਤੇ ਕਬਜ਼ਾ ਕਰਨ ਵਿਚ ਕਾਮਯਾਬ ਹੋ ਗਏ ਹਨ।
ਇਸ ਦੌਰਾਨ ਲੰਡਨ ਤੋਂ ਇਕ ਰਿਪਰੋਟ ਅਨੁਸਾਰ ਇਸਲਾਮਿਕ ਸਟੇਟ ਗਰੁੱਪ ਨੇ ਇਰਾਨ ਦੇ ਪਰਮਾਣੂ ਹਥਿਆਰਾਂ ‘ਤੇ ਕਬਜ਼ਾ ਕਰਨ, ਨਾਜ਼ੀਆਂ ਦੀ ਤਰ੍ਹਾਂ ਨਸਲਘਾਤ ਕਰਨ ਤੇ ਆਪਣੇ ਖਲੀਫ਼ੇ ਦਾ ਅਧਿਕਾਰ ਖੇਤਰ ਵਧਾਉਣ ਦੇ ਮਨਸੂਬੇ ਬਣਾਏ ਹਨ। ‘ਦਿ ਸੰਡੇ ਟਾਈਮਜ਼’ ਵਿਚ ਛਪੀ ਰਿਪੋਰਟ ਅਨੁਸਾਰ ਆਈæਐਸ਼ ਨੇ ਆਪਣੇ ਕਾਰਕੁਨਾਂ ਨੂੰ ਇਰਾਨ ਖ਼ਿਲਾਫ਼ ਜੰਗ ਛੇੜਨ ਤੇ ਇਸ ਦੇ ਪਰਮਾਣੂ ਭੇਤਾਂ ‘ਤੇ ਕਬਜ਼ਾ ਕਰਨ ਦਾ ਸੱਦਾ ਦਿੱਤਾ ਹੈ। ਪਤਾ ਲੱਗਿਆ ਹੈ ਕਿ ਗਰੁੱਪ ਦੀ ਬਹੁਤ ਹੀ ਗੁਪਤ ਛੇ ਮੈਂਬਰੀ ਜੰਗੀ ਕੈਬਨਿਟ ਦੇ ਮੈਂਬਰ ਅਬਦੁੱਲਾ ਅਹਿਮਦ ਅਲ-ਮੇਸ਼ੇਦਾਨੀ ਵੱਲੋਂ ਲਿਖੇ ਇਕ ਮਨੋਰਥ ਪੱਤਰ ਤੋਂ ਇਸ ਦਾ ਖੁਲਾਸਾ ਹੋਇਆ ਹੈ।
ਇਹ ਦਸਤਾਵੇਜ਼ ਇਰਾਨੀ ਦਸਤਿਆਂ ਨੂੰ ਆਈæਐਸ਼ ਦੇ ਇਕ ਕਮਾਂਡਰ ਦੇ ਘਰ ਉਪਰ ਮਾਰੇ ਛਾਪੇ ਦੌਰਾਨ ਬਰਾਮਦ ਹੋਇਆ ਸੀ। ਇਸ ਦੀ ਪੱਛਮੀ ਸੁਰੱਖਿਆ ਅਫਸਰਾਂ ਵੱਲੋਂ ਘੋਖ ਕੀਤੀ ਗਈ ਹੈ ਤੇ ਉਨ੍ਹਾਂ ਇਸ ਨੂੰ ਪ੍ਰਮਾਣਿਕ ਮੰਨਿਆ ਹੈ। ਦਸਤਾਵੇਜ਼ ਵਿਚ ਇਹ ਵੀ ਆਖਿਆ ਗਿਆ ਹੈ ਕਿ ਰੂਸ ਨੂੰ ਇਰਾਨ ਤੇ ਇਸ ਦੇ ਪਰਮਾਣੂ ਪ੍ਰੋਗਰਾਮ ਤੋਂ ਆਪਣੇ ਹੱਥ ਹਟਾਉਣੇ ਪੈਣਗੇ।
ਉਧਰ ਪਾਕਿਸਤਾਨੀ ਤਾਲਿਬਾਨ ਨੇ ਹੁਣ ਪਾਸਾ ਬਦਲਦਿਆਂ ਆਈæਐਸ਼ਆਈæਐਸ਼ ਦੀ ਮਦਦ ਕਰਨ ਦਾ ਵਾਅਦਾ ਕੀਤਾ ਹੈ। ਇਹ ਖ਼ਤਰਨਾਕ ਗਰੁੱਪ ਖਿੱਤੇ ਅੰਦਰ ਅਲ-ਕਾਇਦਾ ਦਾ ਦਬਦਬਾ ਖ਼ਤਮ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਤਹਿਰੀਕ-ਏ-ਤਾਲਿਬਾਨ ਪਾਕਿਸਤਾਨ ਜਿਸ ਦੀ ਅਗਵਾਈ ਮੁੱਲਾ ਫਜ਼ਲ-ਉੱਲ੍ਹਾ ਕਰ ਰਿਹਾ ਹੈ, ਨੇ ਇਕ ਬਿਆਨ ਜਾਰੀ ਕਰ ਕੇ ਆਈæਐਸ਼ ਨੂੰ ਮਦਦ ਦੇਣ ਦਾ ਅਹਿਦ ਕੀਤਾ ਹੈ। ਤਾਲਿਬਾਨ ਦੇ ਬੁਲਾਰੇ ਸ਼ਹਿਦੁੱਲਾ ਸ਼ਾਹਿਦ ਨੇ ਈਦ ਦੀ ਮੁਬਾਰਕਵਾਦ ਭੇਜਦਿਆਂ ਮੱਧ ਪੂਰਬ ਵਿਚਲੇ ਸਾਰੇ ਮੁਸਲਿਮ ਲੜਾਕਿਆਂ ਨੂੰ ਇਕਜੁੱਟ ਹੋਣ ਦੀ ਅਪੀਲ ਕੀਤੀ ਹੈ।
___________________________________________
ਹੁਣ ਬ੍ਰਿਟਿਸ਼ ਬੰਦੀ ਦਾ ਸਿਰ ਕਲਮ
ਕਾਹਿਰਾ: ਇਸਲਾਮਿਕ ਸਟੇਟ ਦੇ ਜਹਾਦੀਆਂ ਨੇ ਬਰਤਾਨੀਆ ਦੇ ਬੰਦੀ ਬਣਾਏ ਗਏ ਐਲਨ ਹੇਨਿੰਗ ਦਾ ਸਿਰ ਕਲਮ ਕਰ ਦਿੱਤਾ ਹੈ। ਦਹਿਸ਼ਤਗਰਦਾਂ ਨੇ ਇਸ ਵਹਿਸ਼ੀਆਨਾ ਕਾਰੇ ਦਾ ਵੀ ਵੀਡੀਓ ਜਾਰੀ ਕੀਤਾ ਹੈ। ਵਿਦੇਸ਼ੀਆਂ ਦੇ ਸਿਰ ਵੱਢਣ ਦਾ ਇਹ ਚੌਥਾ ਵੀਡੀਓ ਹੈ ਜੋ ਇਸਲਾਮਿਕ ਸਟੇਟ ਵੱਲੋਂ ਜਾਰੀ ਕੀਤਾ ਗਿਆ ਹੈ। ਵੀਡੀਓ ਦੇ ਅਖੀਰ ਵਿਚ ਦਹਿਸ਼ਤਗਰਦ ਵੱਲੋਂ ਇਕ ਵਿਅਕਤੀ ਨੂੰ ਧਮਕੀ ਦਿੰਦਿਆਂ ਦਿਖਾਇਆ ਗਿਆ ਹੈ ਜਿਸ ਦੀ ਪਛਾਣ ਅਮਰੀਕੀ ਪੀਟਰ ਕੈਸ਼ਿਰਾ ਵਜੋਂ ਹੋਈ ਹੈ। ਅਜੇ ਤੱਕ ਜਾਰੀ ਹੋਏ ਸਾਰੇ ਵੀਡੀਓ ਵਿਚ ਸਿਰ ਕਲਮ ਕਰਨ ਦਾ ਪੂਰਾ ਕਾਰਾ ਨਹੀਂ ਦਿਖਾਇਆ ਗਿਆ ਹੈ ਪਰ ਬ੍ਰਿਟਿਸ਼ ਸਟਾਈਲ ਦੀ ਅੰਗਰੇਜ਼ੀ ਬੋਲਦਾ ਦਹਿਸ਼ਤਗਰਦ ਲੰਬਾ ਚਾਕੂ ਫੜ ਕੇ ਵਿਅਕਤੀਆਂ ਦੇ ਸਿਰ ਕਲਮ ਕਰਦਾ ਜਾਪਦਾ ਹੈ। ਅਮਰੀਕੀ ਪੱਤਰਕਾਰ ਜੇਮਸ ਫੋਲੇ, ਅਮਰੀਕੀ ਇਸਰਾਇਲੀ ਪੱਤਰਕਾਰ ਸਟੀਵਨ ਸੋਟਲੋਫ, ਬ੍ਰਿਟਿਸ਼ ਸਵੈ-ਸੇਵੀ ਡੇਵਿਡ ਹੇਨਜ਼ ਤੇ ਹੁਣ ਹੇਨਿੰਗ ਦੇ ਸਿਰ ਵੱਢਣ ਦਾ ਦਾਅਵਾ ਕੀਤਾ ਗਿਆ ਹੈ।” ਦਹਿਸ਼ਤਗਰਦਾਂ ਵੱਲੋਂ ਪੀਟਰ ਕੈਸਿਗ ਨੂੰ ਅਗਲਾ ਨਿਸ਼ਾਨਾ ਬਣਾਉਣ ਦੀ ਵੀਡੀਓ ਜਾਰੀ ਹੋਣ ਤੋਂ ਬਾਅਦ ਅਮਰੀਕੀ ਸੁਰੱਖਿਆ ਕੌਂਸਲ ਦੇ ਤਰਜਮਾਨ ਕੈਟਲਿਨ ਹੇਡਨ ਨੇ ਪੁਸ਼ਟੀ ਕੀਤੀ ਹੈ ਕਿ ਕੈਸਿਗ ਨੂੰ ਇਸਲਾਮਿਕ ਸਟੇਟ ਦੇ ਦਹਿਸ਼ਤਗਰਦਾਂ ਨੇ ਬੰਦੀ ਬਣਾਇਆ ਹੋਇਆ ਹੈ। ਵੀਡੀਓ ਦੀ ਅਸਲੀਅਤ ਬਾਰੇ ਸ਼ੱਕ ਕਰਨ ਦਾ ਕੋਈ ਕਾਰਨ ਨਹੀਂ ਹੈ, ਉਸ ਨੇ ਕਿਹਾ ਕਿ ਅਮਰੀਕਾ ਫੌਜੀ, ਕੂਟਨੀਤਕ, ਖੁਫ਼ੀਆ ਢੰਗ ਨਾਲ ਪੀਟਰ ਦੀ ਘਰ ਵਾਪਸੀ ਦੇ ਯਤਨ ਕਰਦਾ ਰਹੇਗਾ।