ਫੀਫਾ ਕੱਪ: ਜਰਮਨੀ ਬਣਿਆ ਚੈਂਪੀਅਨ

ਬਰਲਿਨ: ਅਰਜਨਟੀਨਾ ਉੱਤੇ ਸ਼ਾਨਦਾਰ ਜਿੱਤ ਹਾਸਲ ਕਰਕੇ ਜਰਮਨੀ ਨੇ ਫੀਫਾ ਵਿਸ਼ਵ ਕੱਪ ਆਪਣੇ ਨਾਂ ਕਰ ਲਿਆ। ਜਰਮਨੀ ਦੇ ਏਕੀਕਰਨ ਤੋਂ ਬਾਅਦ ਵਿਸ਼ਵ ਕੱਪ ਵਿਚ ਇਹ ਉਸ ਦੀ ਪਹਿਲੀ ਜਿੱਤ ਹੈ। ਵਿਸ਼ੇਸ਼ ਗੱਲ ਇਹ ਹੈ ਕਿ ਜਰਮਨੀ ਨੂੰ ਇਹ ਜਿੱਤ 24 ਸਾਲ ਬਾਅਦ ਮਿਲੀ ਹੈ ਤੇ 1990 ਵਿਚ ਪੱਛਮੀ ਜਰਮਨੀ ਨੇ ਅਰਜਨਟੀਨਾ ਨੂੰ ਹਰਾਇਆ ਸੀ। ਉਧਰ ਵਿਸ਼ਵ ਕੱਪ ਖ਼ਿਤਾਬ ਦਾ ਸੁਪਨਾ ਟੁੱਟਣ ਤੋਂ ਬਾਅਦ ਅਰਜਨਟੀਨਾ ਵਿਚ ਲੋਕਾਂ ਦੇ ਹੰਝੁ ਨਹੀਂ ਰੁਕ ਰਹੇ ਸਨ ਤੇ ਕੁਝ ਨੇ ਕੌਮੀ ਸਨਮਾਨ ਨੂੰ ਲੱਗੀ ਠੇਸ ਦੇ ਬਾਵਜੂਦ ਜਸ਼ਨ ਮਨਾਉਣੇ ਸ਼ੁਰੂ ਕਰ ਦਿੱਤੇ ਜਿਸ ਨਾਲ ਮਾਹੌਲ ਹਿੰਸਕ ਬਣ ਗਿਆ।
ਰਿਕਾਰਡ ਅੱਠਵੀਂ ਵਾਰ ਫਾਈਨਲ ਖੇਡਣ ਵਾਲੀ ਜਰਮਨੀ ਦੀ ਟੀਮ ਵੱਲੋਂ ਦੂਸਰੇ ਹਾਫ ਵਿਚ ਕਲੋਜ ਦੀ ਜਗ੍ਹਾ ਪਾਏ ਬਦਲਵੇਂ ਖਿਡਾਰੇ ਮਾਰੀਓ ਗੋਟਜ਼ੇ ਨੇ ਵਾਧੂ ਸਮੇਂ ਵਿਚ ਆਪਣੀ ਟੀਮ ਲਈ ਗੋਲ ਕੀਤਾ। ਇਸ ਜਿੱਤ ਨਾਲ ਜਰਮਨੀ ਦੀ ਟੀਮ ਦੱਖਣੀ ਅਮਰੀਕੀ ਧਰਤੀ ‘ਤੇ ਵਿਸ਼ਵ ਕੱਪ ਜਿੱਤਣ ਵਾਲੀ ਪਹਿਲੀ ਯੂਰਪੀਅਨ ਟੀਮ ਬਣ ਗਈ ਤੇ ਮੈਸੀ ਦੀ ਅਗਵਾਈ ਵਿਚ ਅਰਜਨਟੀਨਾ ਦਾ ਵਿਸ਼ਵ ਕੱਪ ਜਿੱਤਣ ਦਾ ਸੁਪਨਾ ਟੁੱਟ ਗਿਆ।
ਸੈਮੀਫਾਈਨਲ ਵਿਚ ਬ੍ਰਾਜ਼ੀਲ ਨੂੰ 7-1 ਨਾਲ ਹਰਾਉਣ ਵਾਲੀ ਜਰਮਨ ਟੀਮ ਦੇ ਫਾਰਵਰਡ ਖਿਡਾਰੀਆਂ ਨੇ ਕਈ ਮੂਵ ਬਣਾਏ, ਪਰ ਅਰਜਨਟੀਨਾ ਵੱਲੋਂ ਸੈਮੀਫਾਈਨਲ ਮੈਚ ਵਿਚ ਹੀਰੋ ਰਹੇ ਗੋਲਕੀਪਰ ਸਰਜੀਓ ਰੋਮੇਰੋ ਨੇ ਸ਼ਾਨਦਾਰ ਬਚਾਅ ਕੀਤਾ। ਪਹਿਲੇ ਹਾਫ ਵਿਚ ਜਰਮਨੀ ਦਾ ਮਿਡਫੀਲਡਰ ਟੋਨੀ ਕਰੂਸ ਨੇ ਹੈਡਰ ਨਾਲ ਆਪਣੇ ਗੋਲਕੀਪਰ ਮੈਨੁਏਲ ਨੇਯੂਰ ਨੂੰ ਬਾਲ ਦੇਣ ਦੀ ਕੋਸ਼ਿਸ਼ ਕੀਤੀ, ਪਰ ਇਹ ਸਿੱਧੀ ਅਰਜਨਟੀਨਾ ਦੇ ਖਿਡਾਰੀ ਹਿਗੁਏਨ ਤੋਂ ਚਲੀ ਗਈ, ਜਿਸ ‘ਤੇ ਉਹ ਗੋਲ ਨਹੀਂ ਕਰ ਸਕਿਆ। ਜਰਮਨ ਦੇ ਬਾਸਟਾਇਨ ਸ਼ਵਾਈਨਸਟਾਈਗਰ ਨੂੰ ਮੈਚ ਦਾ ਪਹਿਲਾ ਪੀਲਾ ਕਾਰਡ ਵਿਖਾਇਆ ਗਿਆ। ਅਰਜਨਟੀਨਾ ਵੱਲੋਂ ਵੀ ਪਹਿਲੇ ਹਾਫ ਵਿਚ ਮੈਸੀ ਨੇ ਸਾਥੀ ਖਿਡਾਰੀਆਂ ਨੂੰ ਗੋਲ ਕਰਨ ਦੇ ਮੌਕੇ ਦਿਵਾਏ। ਮੈਚ ਦੇ 30ਵੇਂ ਮਿੰਟ ਵਿਚ ਅਰਜਨਟੀਨਾ ਦਾ ਗੋਨਜ਼ਾਲੋ ਹਿਗੁਏਨ ਨੇ ਮੈਸੀ ਦੇ ਪਾਸ ‘ਤੇ ਗੋਲ ਤਾਂ ਕਰ ਦਿੱਤਾ, ਪਰ ਇਟਲੀ ਦੇ ਰੈਫਰੀ ਨੇ ਉਸ ਨੂੰ ਆਫ ਸਾਈਡ ਕਰਾਰ ਦੇ ਦਿੱਤਾ। 37ਵੇਂ ਮਿੰਟ ਵਿਚ ਜਰਮਨੀ ਦੇ ਆਂਦਰੇ ਸ਼ੁਰਲੇ ਵੱਲੋਂ ਸ਼ਾਨਦਾਰ ਕਿੱਕ ਲਗਾਈ ਗਈ, ਜਿਸ ਨੂੰ ਰੋਮੇਰੋ ਨੇ ਬੇਹਤਰੀਨ ਢੰਗ ਨਾਲ ਬਚਾਇਆ। ਹਾਫ ਟਾਈਮ ਤੋਂ ਬਾਅਦ ਅਰਜਨਟੀਨਾ ਦੀ ਟੀਮ ਜਰਮਨ ‘ਤੇ ਭਾਰੀ ਨਜ਼ਰ ਆਈ, ਮੈਚ ਦੇ 47ਵੇਂ ਮਿੰਟ ਵਿਚ ਅਰਜਨਟੀਨਾ ਦਾ ਸਟਾਰ ਖਿਡਾਰੀ ਲਿਓਨੇਲ ਮੈਸੀ ਗੋਲ ਕਰਨ ਦਾ ਬੇਹਤਰੀਨ ਮੌਕਾ ਖੁੰਝ ਗਿਆ। ਦੂਸਰੇ ਹਾਫ ਵਿਚ ਵੀ ਦੋਵੇਂ ਟੀਮਾਂ ਗੋਲ ਕਰਨ ਵਿਚ ਅਸਫਲ ਰਹੀਆਂ। ਇਸ ਤੋਂ ਬਾਅਦ ਵਾਧੂ ਸਮਾਂ ਦਿੱਤਾ ਗਿਆ। ਵਾਧੂ ਸਮੇਂ ਦੇ ਸ਼ੁਰੂਆਤੀ ਮਿੰਟ ਵਿਚ ਜਰਮਨ ਵੱਲੋਂ ਆਂਦਰੇ ਸ਼ੁਰਲੇ ਵੱਲੋਂ ਲਗਾਈ ਗਈ ਕਿੱਕ ਨੂੰ ਰੋਮੇਰੋ ਨੇ ਸ਼ਾਨਦਾਰ ਤਰੀਕੇ ਨਾਲ ਬਚਾਇਆ। ਅਰਜਨਟੀਨਾ ਵੱਲੋਂ ਵਾਧੂ ਸਮੇਂ ਵਿਚ ਰੋਡਰੀਗੋ ਪਲਾਸੀਓ ਗੋਲ ਕਰਨ ਦਾ ਬੇਹਤਰੀਨ ਮੌਕਾ ਖੁੰਝ ਗਿਆ। ਵਾਧੂ ਸਮੇਂ ਦੇ ਪਹਿਲੇ 15 ਮਿੰਟਾਂ ਵਿਚ ਵੀ ਕੋਈ ਟੀਮ ਗੋਲ ਨਹੀਂ ਕਰ ਸਕੀ। ਇਸ ਤੋਂ ਬਾਅਦ ਮੈਚ ਦੇ 113ਵੇਂ ਮਿੰਟ ਵਿਚ ਆਂਦਰੇ ਸ਼ੁਰਲੇ ਦੇ ਪਾਸ ‘ਤੇ ਕਲੋਸ ਦੀ ਜਗਾ ਮੈਦਾਨ ‘ਤੇ ਆਏ ਮਾਰੀਓ ਗੋਟਜ਼ੇ ਨੇ ਗੋਲ ਕਰਕੇ ਆਪਣੀ ਟੀਮ ਦੀ ਜਿੱਤ ਯਕੀਨੀ ਬਣਾ ਦਿੱਤੀ।
ਗੋਟਜ਼ੇ ਦਾ ਵਿਸ਼ਵ ਕੱਪ ਵਿਚ ਇਹ ਦੂਸਰਾ ਗੋਲ ਸੀ। ਮੈਚ ਸ਼ੁਰੂ ਹੋਣ ਤੋਂ ਪਹਿਲਾਂ ਸਪੇਨ ਦੇ ਸਾਬਕਾ ਖਿਡਾਰੀ ਕਾਰਲਸ ਪਾਊਲ ਤੇ ਮਾਡਲ ਜਿਸਲੇ ਬਨਚਨ ਨੇ ਮੈਦਾਨ ‘ਤੇ ਫੀਫਾ ਟਰਾਫੀ ਲਿਆਂਦੀ। ਮੈਚ ਦੌਰਾਨ ਬ੍ਰਾਜ਼ੀਲ ਦੇ ਸਾਬਕਾ ਖਿਡਾਰੀ ਪੇਲੇ, ਕਾਕਾ ਤੇ ਇੰਗਲੈਂਡ ਦਾ ਸਾਬਕਾ ਖਿਡਾਰੀ ਡੇਵਿਡ ਬੈਕਹਮ ਵੀ ਸਟੇਡੀਅਮ ਵਿਚ ਮੌਜੂਦ ਸਨ।
___________________________________________
ਇਕ ਗੋਲ ਨੇ ਗੇਟਜ਼ੇ ਨੂੰ ਬਣਾਇਆ ਹੀਰੋ
ਬਰਲਿਨ: ਵਿਸ਼ਵ ਕੱਪ ਫਾਈਨਲ ਵਿਚ ਜੇਤੂ ਗੋਲ ਕਰਨ ਵਾਲੇ ਮਾਰੀਓ ਗੇਟਜ਼ੇ ਨੂੰ ਇਸ ਗੋਲ ਨੇ ਹੀਰੋ ਬਣਾ ਦਿੱਤਾ ਹੈ। ਵਿਸ਼ਵ ਕੱਪ ਵਿਚ ਗੇਟਜ਼ੇ ਦਾ ਇਹ ਪਹਿਲਾ ਮੈਚ ਸੀ ਤੇ ਉਸ ਨੂੰ ਮਿਰੋਸਲਾਵ ਕਲੋਜ਼ ਦੇ ਬਦਲ ਵਜੋਂ ਮੈਚ ਦੇ 87ਵੇਂ ਮਿੰਟ ਵਿਚ ਖੇਡਣ ਲਈ ਭੇਜਿਆ ਗਿਆ। ਗੇਟਜ਼ੇ ਦਾ ਕਹਿਣਾ ਹੈ ਕਿ ਉਸ ਨੂੰ ਅਜੇ ਵੀ ਇਹ ਯਕੀਨ ਨਹੀਂ ਹੋ ਰਿਹਾ ਕਿ ਉਸ ਨੇ ਅਰਜਨਟੀਨਾ ਵਿਰੁੱਧ ਫਾਈਨਲ ਵਿਚ ਮੈਚ ਦੇ ਵਾਧੂ ਸਮੇਂ ਵਿਚ ਕੀਤੇ ਗੋਲ ਨਾਲ ਜਰਮਨੀ ਨੂੰ ਜਿੱਤ ਦਿਵਾਈ ਹੈ। ਉਸ ਨੇ ਕਿਹਾ ਕਿ ਇਹ ਅਨੌਖਾ ਤੇ ਹੈਰਾਨੀ ਵਾਲਾ ਅਹਿਸਾਸ ਹੈ। ਇਸ ਨੂੰ ਬਿਆਨ ਕਰਨ ਲਈ ਸ਼ਬਦ ਨਹੀਂ ਹਨ। ਤੁਸੀਂ ਸਿਰਫ ਗੋਲ ਕਰਦੇ ਹੋ ਤੇ ਅਸਲ ਵਿਚ ਨਹੀਂ ਜਾਣਦੇ ਕਿ ਉਸ ਤੋਂ ਬਾਅਦ ਕੀ ਹੁੰਦਾ ਹੈ। ਇਹ ਪੂਰੀ ਟੀਮ ਤੇ ਦੇਸ਼ ਲਈ ਜਸ਼ਨ ਮਨਾਉਣ ਦਾ ਸਮਾਂ ਹੈ। ਵਿਸ਼ਵ ਕੱਪ ਜਿੱਤਣਾ ਤੇ ਉਹ ਵੀ ਬਰਾਜ਼ੀਲ ਵਿਚ, ਇਹ ਸੁਪਨਾ ਸੱਚ ਹੋਣ ਵਰਗਾ ਹੀ ਹੈ। ਜ਼ਿਕਰਯੋਗ ਹੈ ਕਿ ਗੇਟਜ਼ੇ ਲਈ ਪਿਛਲੇ ਬਾਰਾਂ ਮਹੀਨੇ ਬੇਹੱਦ ਸੰਘਰਸ਼ਪੂਰਨ ਰਹੇ ਤੇ ਉਹ ਆਪਣੇ ਕਲੱਬ ਬਾਇਰਨ ਮਿਊਨਿਖ ਵਿਚ ਸ਼ੁਰੂਆਤੀ ਗਿਆਰਾਂ ਖਿਡਾਰੀਆਂ ਵਿਚ ਵੀ ਥਾਂ ਨਹੀਂ ਬਣਾ ਸਕਿਆ ਸੀ। ਵਿਸ਼ਵ ਕੱਪ ਵਿੱਚ ਵੀ ਉਸ ਨੂੰ ਮਿਰੋਸਲਾਵ ਕਲੋਜ਼ ਦੇ ਬਦਲ ਵਜੋਂ ਮੈਚ ਦੇ 87ਵੇਂ ਮਿੰਟ ਵਿਚ ਖੇਡਣ ਲਈ ਭੇਜਿਆ ਗਿਆ। ਗੇਟਜ਼ੇ ਨੇ ਕਿਹਾ ਕਿ ਇਹ ਟੂਰਨਾਮੈਂਟ ਤੇ ਸਾਲ ਉਸ ਲਈ ਆਸਾਨ ਨਹੀਂ ਰਿਹਾ।
_________________________________________
ਮੈਸੀ ਨੂੰ ਮਿਲਿਆ ਗੋਲਡਨ ਬਾਲ
ਰੀਓ ਡੀ ਜਨੇਰੋ: ਬੇਸ਼ੱਕ ਅਰਜਨਟੀਨਾ ਫਾਈਨਲ ਵਿਚ ਜਰਮਨੀ ਕੋਲੋਂ ਇਕ ਗੋਲ ਨਾਲ ਹਾਰ ਗਿਆ ਪਰ ਮੈਸੀ ਟੂਰਨਾਮੈਂਟ ਦਾ ਸਰਵੋਤਮ ਖਿਡਾਰੀ ਬਣ ਕੇ ਗੋਲਡਨ ਬਾਲ ਪੁਰਸਕਾਰ ਦਾ ਹੱਕਦਾਰ ਬਣ ਗਿਆ। ਉਹ ਮਹਾਨ ਡੀਏਗੋ ਮੈਰਾਡੋਨਾ ਬਾਅਦ ਇਹ ਪੁਰਸਕਾਰ ਹਾਸਲ ਕਰਨ ਵਾਲਾ ਅਰਜਨਟੀਨਾ ਦਾ ਦੂਜਾ ਖਿਡਾਰੀ ਬਣ ਗਿਆ ਹੈ। ਮੈਰਾਡੋਨਾ ਨੇ 1986 ਵਿਚ ਇਹ ਪੁਰਸਕਾਰ ਹਾਸਲ ਕੀਤਾ ਸੀ ਤੇ ਉਦੋਂ ਅਰਜਨਟੀਨਾ ਨੇ ਜਰਮਨੀ ਨੂੰ ਹਰਾ ਕੇ ਖ਼ਿਤਾਬ ਜਿੱਤਿਆ ਸੀ। ਟੂਰਨਾਮੈਂਟ ਦੇ ਚਾਰ ਵਾਰ ਮੈਨ ਆਫ ਦਿ ਮੈਚ ਰਹੇ ਮੈਸੀ ਨੇ ਇਸ ਪੁਰਸਕਾਰ ਦੀ ਦੌੜ ਵਿਚ ਜਰਮਨੀ ਦੇ ਥਾਮਸ ਮੂਲਰ, ਨੈਦਰਲੈਂਡਜ਼ ਦੇ ਅਰਜੇਨ ਰੋਬੇਨ ਨੂੰ ਪਛਾੜਿਆ। ਉਸ ਨੇ ਟੂਰਨਾਮੈਂਟ ਵਿਚ ਚਾਰ ਗੋਲ ਕੀਤੇ। ਕੋਲੰਬੀਆ ਦੇ ਸਟਰਾਈਕਰ ਜੇਮਜ਼ ਰੌਡਰਿਗਜ਼ ਨੇ ਟੂਰਨਾਮੈਂਟ ਵਿਚ ਸਭ ਤੋਂ ਵੱਧ ਛੇ ਗੋਲ ਕੀਤੇ ਤੇ ਉਸ ਨੂੰ ਗੋਲਡਨ ਬੂਟ ਪੁਰਸਕਾਰ ਹਾਸਲ ਹੋਇਆ।