ਬੈਂਗਲੁਰੂ:ਭਾਰਤ ਦੇ ਸਟਾਰ ਜੈਵਲਿਨ ਥਰੋਅਰ ਨੀਰਜ ਚੋਪੜਾ ਨੇ ਅੱਜ ਐਨ.ਸੀ. ਕਲਾਸਿਕ 2025 ‘ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਖਿਤਾਬ ਆਪਣੇ ਨਾਂਅ ਕੀਤਾ। ਨੀਰਜ ਜੋ ਕਿ ਮੁਕਾਬਲੇ ਦਾ ਮੇਜ਼ਬਾਨ ਵੀ ਹੈ,
ਨੇ ਮੁਕਾਬਲੇ ਦਾ ਪਹਿਲਾ ਖਿਤਾਬ ਜਿੱਤਿਆ ਹੈ। ਉਸਨੇ ਪੁਰਸ਼ਾਂ ਦੇ ਨੇਜਾ ਸੁੱਟਣ ਮੁਕਾਬਲੇ ‘ਚ 86.18 ਮੀਟਰ ਦੇ ਥਰੋਅ ਨਾਲ ਪਹਿਲਾ ਸਥਾਨ ਪ੍ਰਾਪਤ ਕੀਤਾ। ਉਸਨੇ ਬੈਂਗਲੁਰੂ ਦੇ ਕਾਂਤੀਰਵਾ ਸਟੇਡੀਅਮ ‘ਚ ਇਹ ਇਤਿਹਾਸ ਰਚਿਆ। 27 ਸਾਲਾ ਨੀਰਜ ਅੰਤਰਰਾਸ਼ਟਰੀ ਮੁਕਾਬਲੇ ‘ਚ ਮੇਜ਼ਬਾਨ ਵਜੋਂ ਹਿੱਸਾ ਲੈਣ ਵਾਲਾ ਪਹਿਲਾ ਭਾਰਤੀ ਹੈ। ਇਥੇ ਜ਼ਿਕਰਯੋਗ ਹੈ ਕਿ ਐਨ.ਸੀ. ਕਲਾਸਿਕ ਨੂੰ ਵਿਸ਼ਵ ਅਥਲੈਟਿਕਸ ਵਲੋਂ ‘ਸ਼੍ਰੇਣੀ ਏ’ ਦਾ ਦਰਜਾ ਪ੍ਰਾਪਤ ਹੈ। ਡਬਲ ਓਲੰਪਿਕ ਤਗਮਾ ਜੇਤੂ ਨੀਰਜ ਨੇ ਫਾਊਲ ਥਰੋਅ ਨਾਲ ਸ਼ੁਰੂਆਤ ਕੀਤੀ। ਉਸਨੇ ਦੂਜੀ ਕੋਸ਼ਿਸ਼ ‘ਚ 82.99 ਮੀਟਰ ‘ਤੇ ਨੇਜਾ ਸੁੱਟਿਆ। ਉਸਨੇ ਤੀਜੀ ਕੋਸ਼ਿਸ਼ ‘ਚ 86.18 ਮੀਟਰ ਸੁੱਟਿਆ, ਜੋ ਕਿ ਸਭ ਤੋਂ ਵਧੀਆ ਸੀ। ਇਸ ਤੋਂ ਬਾਅਦ, ਉਸਨੇ ਆਪਣੇ ਜਾਣੇ-ਪਛਾਣੇ ਅੰਦਾਜ਼ ‘ਚ ਹਵਾ ‘ਚ ਆਪਣੇ ਦੋਵੇਂ ਹੱਥ ਚੁੱਕ ਕੇ ਜਸ਼ਨ ਮਨਾਇਆ।
ਸਟੇਡੀਅਮ ‘ਚ ਮੌਜੂਦ ਦਰਸ਼ਕਾਂ ਨੇ ਤਾੜੀਆਂ ਤੇ ਸ਼ੋਰ ਨਾਲ ਉਸਦਾ ਸਵਾਗਤ ਕੀਤਾ। ਹਾਲਾਂਕਿ, ਚੌਥੀ ਕੋਸ਼ਿਸ਼ ‘ਚ ਫਾਊਲ ਹੋਇਆ ਪਰ ਭਾਰਤੀ ਸਟਾਰ ਨੇ 5ਵੀਂ ਕੋਸ਼ਿਸ਼ ‘ਚ 84.07 ਮੀਟਰ ‘ਤੇ ਨੇਜਾ ਸੁੱਟਿਆ। ਇਸ ਦੇ ਨਾਲ ਹੀ, ਭਾਰਤੀ ਸਟਾਰ ਦਾ ਛੇਵਾਂ ਅਤੇ ਆਖਰੀ ਥਰੋਅ 82.22 ਮੀਟਰ ਸੀ। ਇਹ ਉਸਦਾ ਲਗਾਤਾਰ ਤੀਜਾ ਖਿਤਾਬ ਹੈ। ਨੀਰਜ ਨੇ ਇਸ ਤੋਂ ਪਹਿਲਾਂ ਪੈਰਿਸ ਡਾਇਮੰਡ ਲੀਗ (20 ਜੂਨ) ਅਤੇ ਓਸਟਰਾਵਾ, ਪੋਲੈਂਡ (24 ਜੂਨ) ‘ਚ ਗੋਲਡਨ ਸਪਾਈਕ ‘ਚ ਖਿਤਾਬ ਜਿੱਤਿਆ ਸੀ। ਇਸ ਮੁਕਾਬਲੇ ਦੌਰਾਨ ਕੀਨੀਆ ਦੇ ਜੂਲੀਅਸ ਯੇਗੋ ਦੂਜੇ ਸਥਾਨ ‘ਤੇ ਰਹੇ। ਉਸਨੇ 84.51 ਮੀਟਰ ਥਰੋਅ ਸੁੱਟਿਆ। ਸ਼੍ਰੀਲੰਕਾ ਦੇ ਰੁਮੇਸ਼ ਪਥੀਰਾਗੇ (84.34 ਮੀਟਰ ਥਰੋਅ) ਤੀਜੇ ਸਥਾਨ ‘ਤੇ ਰਹੇ। ਭਾਰਤ ਦੇ ਸਚਿਨ ਯਾਦਵ ਚੌਥੇ ਸਥਾਨ ‘ਤੇ ਰਹੇ। ਜ਼ਿਕਰਯੋਗ ਹੈ ਕਿ ਨੀਰਜ ਨੇ ਇਸ ਮੁਕਾਬਲੇ ਦਾ ਆਯੋਜਨ ਜੇ.ਐਸ.ਡਬਲਿਊ. ਸਪੋਰਟਸ ਦੇ ਸਹਿਯੋਗ ਨਾਲ ਕੀਤਾ ਹੈ। ਇਸਨੂੰ ਅਥਲੈਟਿਕਸ ਫੈਡਰੇਸ਼ਨ ਆਫ ਇੰਡੀਆ ਵਲੋਂ ਵੀ ਮਨਜ਼ੂਰੀ ਦਿੱਤੀ ਗਈ ਹੈ।